जिल्ला प्रशासन कार्यालयले मागेको २८ हजार रुपैयाँ धरौटी तिर्न नसक्दा एमाओवादी अध्यक्ष प्रचण्डलाई थप्पड हान्ने बाग्लुङका पदम कुँवरलाई जेल चलान गरिएको छ ।
प्रहरीले उनलाई सोमबार काठमाडौं जिल्ला प्रशासनमा हाजिर गराएको थियो । सार्वजनिक अपराध मुद्दामा सुनुवाइ गर्दै काठमाडौंका प्रमुख जिल्ला अधिकारी चूडामणि शर्माले २८ हजार धरौटी राखेर तारेखमा छोड्न आदेश दिएको थियो । तर, धरौटी राख्ने रकम नभएपछि उनलाई केन्द्रीय कारागार चलान गरिएको हो । उनले अब एक दिनको ३० रुपैयाँ बराबरले तोकिएको धरौटी पूरा नगरेसम्म जेलमा बस्नु पर्नेछ ।
कुँवरका भिनाजु भीम भारतीले आफूहरुको आर्थिक अवस्था कमजोर भएकाले धरौटी बुझाउन नसकेको अनलाइनखबरलाई बताउनुभयो । ‘हामीसँग त्यत्रो पैसा छैन, त्यति पैसाले त महिनौंसम्म गुजारा गर्न पुग्छ ।’-भारतीले भन्नुभयो ।
यसअघि एमाओवादी अध्यक्ष प्रचण्डले कुँवरलाई माफी दिएको खबर सञ्चार माध्यममा आए पनि प्रचण्डको माफी जिल्ला प्रशासनले थाहा पाएन ।
महाराजगन्जस्थित २ नम्बर गणमा राखिएका पदमलाई जिल्ला प्रहरी कार्यालय हनुमानढोका ल्याएको केहीबेरमै सीडियो कार्यालयमा उपस्थित गराएको थियो । गणका प्रहरीले आजै बिहान पदमका भिनाजु भीम भारतीलाई फोन गरेर कपडा लिएर आउन भनेको थियो ।
कुँवरले गत मंसिर १ मा भृकुटीमण्डमा एमाओवादीद्वारा आयोजित चियापानमा प्रचण्डलाई झापड हानेका थिए । लगत्तै माओवादी कार्यकर्ताबाट कुटिएका कुँवरलाई प्रहरीले पक्राउ गरेको थियो ।
